Երազում Բերանի անդամները տեսնելը

 Վերին ծնոտի ատամները՝ ընտանիքին վերաբերող եղելություններ: Ստորինը՝ ուրիշներին պատահելիք դեպքեր: Բերանի աջ կողմի ատամները ցույց են տալիս տղամարդու, իսկ ձախ կողմինը՝ կնոջ հետ կատարվելիք դեպքեր: Վերին ծնոտի կտրիչ ատամները վերաբերում են մանկությանը, ժանիքները՝ երիտասարդությանը, սեղան ատամները՝ հասուն տարիքին: Ստորին ծնոտի կտրիչ ատամները վերաբերում են գույքերին և կալվածքներին, ժանիքները՝ արժեքավոր իրերին, թանկարժեք զարդերին, սեղան ատամները՝ դրամական հարստության: Այսպիսով, եթե ատամները կամովին ես հանում, ուրեմն քո խելքից ես ընկնում այս կամ այն դրության մեջ, իսկ եթե ուրիշներն են հանում՝ ստիպողաբար ես կրում վերը նշված մեկնությունները: Իսկ եթե իրենք իրենց են ընկնում՝ տեսնողը կրում է երազի հետևանքները և ոչինչ անել չի կարող: Ատամների սովորականից ավելի մեծ լինելը կամ բնական թվից ավելի լինելը՝ ընտանեկան վեճ, երկպառակություն: Բնականից փոքր և քիչ՝ խաղաղություն, գոհություն: Ատամների միանգամից թափվելը՝ տան բաժանում, բուսնելը՝ սիրելիների վերադարձ պատվով, երջանիկ կյանքի վերականգնում: Ատամները ձեռքում բռնելը՝ զավակների մահ, արժեքավոր կորուստ: Սևացածը, փտածը՝ հիվանդություն: Ոսկյա ատամները՝ հիվանդություն, փոքր վնաս հրդեհից, խիստ կարիքավորների համար՝ փայլուն ապագա: Արծաթիցը ունևորների համար՝կործանում, սնանկացում, չունևորների համար՝ ճարպկությամբ, աշխատասիրությամբ դիզված հարստություն: Կապարե, անագե կամ մոմիցը՝ պատիվ, անուն, փայտեն՝ անմիջական մահ: